ប្រវត្តិពាក្យថា "រាត្រីក្រេបទឹកឃ្មុំ"

"ស្នេហ៍អូននឹងបង"

           
                                                               ពាក្យនេះមានប្រភពមកពីអឺរ៉ុប

         

      នៅក្នុងវិហារបាក់បែកមួយកន្លែង នៃប្រទេសអេស្ប៉ាញ គេបានជីករកឃើញក្នុងឆ្នាំ១៨២៣ មានបន្ទប់ពីរបិទជិតឈឹងនៅក្រោមដី ហើយនៅក្នុងបន្ទប់នោះពោរពេញទៅដោយទឹកឃ្មុំដ៏ឈ្ងុយឈ្ងប់។ តាមការស្រាវជ្រាវបានឲ្យដឹងថា ទឹកឃុំនេះមានអាយុកាលប្រមាណជា ១៦០០ ឆ្នាំមកហើយ តែនៅរក្សាឱរសដ៏ផ្អែម ឈ្ងុយឈ្ងប់ ដូចទឹកឃ្មុំថ្មោងថ្មី គ្មានផ្លាស់ប្ដូរ។

     នៅអឺរ៉ុបថ្ងៃរៀបអាពាហ៍ពិពាហ៍ គេឲ្យកូនកម្លោះបីកូនក្រមុំ ឆ្លងកាត់មានទ្វារចូលទៅកាន់បន្ទប់ផ្សំដំណេក ដែលបានយកទឹកឃ្មុំប្រោះព្រំលើក្ដារផ្លូវចូលនោះ។

      ការធ្វើដូចនេះគេមានជំនឿថា​ នឹងនាំមកនូវ ជោគជ័យ សេចក្ដីសុខសាន្ត អាយុយឺនយូរ ព្រមទាំងសុភមង្គលគ្រប់ប្រការដល់កូនកម្លោះក្រមុំតាមសេចក្ដីប្រាថ្នារៀងៗខ្លួន។

       ចំណែកនៅអាស៊ីវិញ ស័ព្ទនេះគេចង់សម្ដៅយក ឱកាសមួយដែល ស្វាមី ភរិយា ដែលទើបរៀបការហើយថ្មោងថ្មី ធ្វើដំណើរមើលទេសភាព នាមាត់សមុទ្រ ក្រោមផ្ទៃមេឃខៀវខ្ចី ទស្សនាកំពង់ផែ និវេសនដ្ឋាន ប្រាង្គប្រាសាទបុរាណជាដើម ហើយក្រេបយកនូវរសជាតិស្នេហារបស់គេ ដែលផ្អែមត្រជាក់ក្លិនប្រហើរ ក្រអូបសាយ ពិសេសដូចទឹកឃ្មុំច្យុតចាកពីឋានព្រះចន្ទ្រា ដែលគេកំពុងភ្នក់រស់ជាតិនេះគ្មានថ្ងៃបញ្ជប់ឡើយ។

ប្រភព៖ វប្បធម៌ទូទៅ ឡុង សារិន

ដោយៈ ឈិន ចណ្ឌី